Wala sang mahimo ang mga opisyal sang Barangay Q. Abeto, Mandurriao, Iloilo City kundi sundon gid ang direktiba sang kapulisan kaangot sa istrikto nga pagdumili sang mga sugal sa mga namatyan.
Ini ang reaksyon ni Punong Barangay Ramon Amoroso Sr. kaangot sa paandam sang Police Regional Office (PRO) VI nga ginadumilian ang illegal gambling sa mga haya kag wala sang exemptions sa idalom sang Presidential Decree No. 1602 ukon ang Anti-Illegal Gambling Law.
Suno kay Amoroso, apisar pa nga nagapati siya nga tradisyon ini sang mga Pilipino, wala man sila sang mahimo kun may layi, kundi sundon gid kag libuton ang ila barangay kun may namatyan.
“Wala ta may mahimo na. Kun may national nga layi, sundon gid na namon sa barangay. Kami gid na guro malibot kun may namatyan; libuton gid na guro namon kag ibawal,” suno sa opisyal.
Nagpanugyan man ini sa iya mga pumuluyo nga kun may haya, magpulaw na lang kag mag-istorya; ukon, dugang niya, ibalik na lang ang hampang nga amo-amo, kun sa diin wala na sang involved nga kwarta.
“Ang akon na lang ya nga pahanumdom sa mga pumuluyo ko, indi na lang maghampang, dapat likawan na lang naton. Pulaw na lang kita kag mag-istorya,” suno kay Amoroso. “Te ibalik ta na ang amo-amo kag sungka sang una eh, amo na lang na siguro.”
Ginpahayag sini nga madamo man kuntani ang mabulig sang mga hampang kaangay sang mahjong bangud kun may nagahampang, indi na kinahanglan nga magpulaw kag magbantay ang tanan nga myembro sang pamilya nga namatyan.
Dugang sini, natuon man ang mga hampang nga ini sa mga pigado bangud nga makabulig pa sa ila ang tong, indi kaangay sa mga manggaranon nga nagahaya sang ila mga minatay sa mga memorial chapel.
Matandaan nga una na nagpahayag si Police Regional Office (PRO) VI Brigadier General Randulf Tuaño nga indi rason ang haya agud nga maglapas sa layi, kag ginpasiguro sini nga arestuhon sang mga pulis ang mga maaktuhan nga nagahimo sini nga aktibidad.
Ginplastar man sini nga ini nga gambling activities naga-involve sang kwarta lakip na ang tong-its, pusoy, tumbo, mahjong, kag iban pa nga indi otorisado nga card games ukon mga pustaanay.#
