Ginduso ni Iloilo City Councilor Johnny Young ang resolution nga nagapanawagan sa pagrepaso sang layi nga amo ang istrikto nga nagadumili sang sugal sa mga belasyunan.
Tuyo sini nga makalab-ot ang panawagan sa Kongreso, Department of the Interior and Local Government (DILG), Philippine National Police (PNP) kag iban pa nga concerned agencies nga himuon ang kumprehensibo nga pag-review sang kasuguan, regulasyon, kag pagpatuman sang mga polisa nga may kaangtanan sa mga aktibidad sa mga haya.
Suno kay Young, sa tunga sang kasubo kag pagtaliwan sang mga pinalangga sa kabuhi, ang mas kinahanglan sang pamilya amo ang paghangop, pagbulig kag pagpalangga.
Dugang pa niya, bisan kinahanglan tumanon ang kasuguan, dapat man hangpon kag respetuhon ang tradisyon kag kinaandan sang mga pumuluyo.
Ginpaathag man sini nga ini nga mga hampang ang kabahin na sang tradisyon sang mga Pilipino nga ginpanubli pa halin sa mga katigulangan — bagay nga dapat nga tahuron kag angkunon.
Nahinambit sini ang resolusyon kadungan sang iya privilege speech nga may tig-ulo nga “Respecting Filipino Traditions: A Call for Compassionate Reconsideration of the Prohibition of Gambling During Funeral Wakes.”
Ang amo nga proposed resolution gin-refer sa Committee on Rules, Ordinances, Resolutions, and Style, Justice and Legal Affairs kag Committee on Games, Amusement and Professional Sports para sa dugang nga pagdiskusyon.
Matandaan nga una na nagpahayag si Police Regional Office (PRO) VI Brigadier General Randulf Tuaño nga wala sang exemptions sa idalom sang Presidential Decree No. 1602 ukon ang Anti-Illegal Gambling Law sa illegal gambling activities nga ginahimo sa mga namatyan.
Gin-insister sang director nga indi rason ang haya agud nga maglapas sa layi, kag ginpasiguro sini nga arestuhon sang mga pulis ang mga maaktuhan nga nagahimo sini nga aktibidad.
Ginplastar man sini nga ini nga gambling activities naga-involve sang kwarta lakip na ang tong-its, pusoy, tumbo, mahjong, kag iban pa nga indi otorisado nga card games ukon mga pustaanay.
