ILOILO CITY- Nagsugod na ang soil exploration kag geotechnical study para sa Panay-Guimaras-Negros Island Bridges.
Sa interview sang Bombo Radyo kay Engr. Sanny Boy Oropel, director sang Department of Public Works and Highways (DPWH) Region 6, iya ginpahayag nga natapos na sang ila consultants ang soil tests para sa mga sections sang alignment para sa tagsa ka pier.
Ang soil tests nga ginpatigayon sang consultants gikan sa Yooshin Engineering Company and Dasan Consultants, nga pareho nga naka-base sa South Korea ang kabahin sang ila trabaho sa detailed engineering design (DED) para sa amo nga mega bridges project nga ginatan-aw nga magpasanyog sang koneksyon sa rehiyon kag may total investment nga P187.54 billion.
Suno kay Oropel, tuman ka importante ang tests sa paghatag sang soil classification data nga may epekto sa parametro sang desinyo.
Pahayag ni Oropel, may anom na ka mga barge ang ginpahamtang sa tunga sang Iloilo kag Guimaras agud magpatigayon sang soil exploration kag geotechnical study.
Kasunod naman sang direktiba halin kay President Ferdinand “Bongbong” Marcos Jr., tinguhaan sang consultants nga matapos ang detailed engineering design segment, ukon ang Segment A, sa Disyembre 2024, sa baylo nga sa 2025.
Ginpasiguro naman ni Oropel nga ang timeline sa pagkompleto sang detailed engineering design ang mangin tayuyon sa pihak sang possible epekto sang tig-ululan sa ulihi nga bahin sang 2024.
Ginahatagan naman prayoridad ang safety sang mga consultants kag trabahador.
Nahibaluan nga ang Panay-Guimaras-Negros Island Bridges nga nagalaba sang 32.47 kilometers kag gintalana nga makompleto sa 2030.
