Nagahanda na ang Department of Health (DOH) sa ginapanan-aw nga pagsaka sang kaso sang trangkaso kasunod sang pagsugod na sang rainy season sa Pilipinas.
Sa oversight meeting sang House Committee on Appropriations kaupod sa DOH, ginpahayag ni Assistant Secretary Albert Domingo nga gina-monitor na sang ahensya ang ini nga mga kaso sang sip-on kag trangkaso nga wala man naangot sa COVID-19 infection.
Magabakal man ang ahensya sang dugang nga doses sang pneumococcal conjugate vaccines kag influenza vaccines bilang kabahin sang preparasyon.
Antes sini, nagpahanumdom si House Deputy Majority Leader kag former Health secretary Janette Garin nga importante ang flu kag pneumonia vaccines para sa healthcare workers, senior citizens, kag immunocompromised ilabi na bangud sa pagtuhaw sang COVID-19 “FLiRT” variants.
Sa pag-shift naman sang Pilipinas halin sa mainit pakadto sa tag-ululan, ang ginabantayan sang DOH amo ang “WILD” nga nagakahulugan nga Water and food-borne diseases; Influenza-like illnesses; Leptospirosis; kag Dengue.
Kahapon, Mayo 29, sang pormal na nga gindeklarar sang state weather bureau ang pagsugod sang rainy season sa pungsod.
