ILOILO CITY – 25% sa gihapon sang mga consolidated public utility vehicles halin sa first town municipalities ang ginapasugtan nga makasulod sa syudad sang lloilo subong nga adlaw.
Ini ang sa pihak sang pagkumpirma sang Iloilo Provincial Government nga nagpasugot na si Iloilo City Mayor Jerry Treñas nga makasulod ang 40% nga mga consolidated nga jeep sa syudad agud malikawan ang pagginutok sang mga pasahero sa terminal.
Sa interview sang Bombo Radyo kay Mr. Michael Villanueva, Traffic Aid Assistant Supervisor sa Iloilo City Traffic Management Unit (ICTMU), iya ginpahayag nga wala pa sila naabisuhan nga pasugtan nga makasulod ang 40% sang mga consolidated nga jeep sa syudad.
Sa subong suno kay Villanueva, 25% sa gihapon sang mga consolidated nga jeep ang ginapasulod sa Iloilo City.
Apang may yara naman sang 15% nga buffer units ukon standby units sa tagsa ka mga terminal.
Ang nasambit nga mga buffer units amo ang ila ginapasugtan nga makasulod sa syudad sa tion nga kulangon ang mga jeep.
Nahibaluan nga may yara sa 21 sa kabug-usan nga 53 ka mga units sang Pavia Via Aquino Avenue nga ruta ang makasulod sa syudad kag 21 naman sa 52 ka units sang Pavia – Iloilo City via La Paz nga ruta.
Ang Iloilo City – Leganes via Aquino Ave nga ruta ang mahimo makapasulod sang 94 ka units, 23 naman sa Iloilo City – Leganes Via La Paz route, 16 ka mga units sang Iloilo City – Oton Derecho, kag 49 ka mga units sang Iloilo City – Oton -Anhawan.
