ILOILO CITY- Arestado ang isa ka pulis nga assigned sa Mobile Force Company sa Iloilo Police Provincial Office matapos ginluthang-patay ang isa man ka pulis nga naka-destino sa Bacolod City Mobile Patrol Unit.
Natabo ang insidente sa Camella Subdivision sa Barangay Tangub, Bacolod City.
Ang suspek amo nga si Patrolman Alvin Rios, 26, residente sang Barangay Bugnay, Valderama, Antique.
Ang biktima amo si PSSg Jotham Aremtuto, 31,residente sang Barangay Paraiso, Sagay City.
Base sa imbestigasyon, naabtan sang suspek ang iya live-in partner sa ila mismo balay kaupod ang biktima.
Didto na kag ginluthang sang suspek ang biktima sang duha ka beses.
Sang natabo ang krime, yara man ang anom ka bulan nga anak sang babaye kag sang suspek.
Gindala pa sa ospital ang biktima apang ginbawian gid sang kabuhi.
Napreso na subong sa custodial facility sang Police Station 8 sa Bacolod City si Pat. Rios kag posible magpangatubang sang kaso nga murder.
