ILOILO CITY- Nagpatuman ang Japan sang tax cut program bilang kabahin sang ila tikang agud mapamag-an ang mabug-at nga epekto sang inflation sa mga ordinary nga mga pamilya.
Suno kay Bombo Josel Palma, international correspondent sa Japan, katuyuan ni Prime Minister Fumio Kishida nga mapabatyag sa mga pumuluyo ang benepisyo sang suporta nga ginahatag sang gobyerno.
Ang tax cut program ang yara sa 40,000-yen-per-person kun sa diin 30,000 yen ang halin sa income tax, kag 10,000 yen ang halin sa resident tax.
Ang mga high-income earners nga nagabaton sang 20 million yen ukon mas mataas pa kada tuig ang wala nalakip sa programa.
Ang programa magasakop sang kapin 95 million ka mga tawo bilang mayor nga feature sang pagtinguha sang gobyerno nga buligan ang mga konsumidor sa panahon nga tuman ang inflation kag wala naman sang pagtaas gid sang sweldo.
Ini nga tax cuts ang katumbas sang gastuhon sang gobyerno nga 3.28 trillion yen.
