ILOILO CITY- Nag-upod sa duha ka adlaw nga transport strike ang kapin 80 ka mga units sang jeep sa idalom sang Jeepney Operators and Driver Association of Oton.
Ini may kaangtanan sa ila pagpabutyag sang ila pagpamatok sa ginapahayag palpak nga implementasyon sang Enhanced Local Public Transport Route Plan.
Sa interview sang Bombo Radyo kay Raphael Alla, Presidente sang Jeepney Operators and Driver Association of Oton,iya ginpahayag nga tunga gid sang ila kita ang nadula humalin sang ginpatuman ang route plan nga nagalimita sang ila ruta kun sa diin kutob na lamang sila sa Mohon Terminal kag indi na sila pagpasudlon pakadto sa San Rafael, Mandurriao kun sa diin sila kutob pwede makakuha sang pasahero.
Suno kay Alla, indi gid makasustiner ang ila kita ilabi na nga kalabanan sa ila mga myembro nga drivers ang nagaarkila man lang sang jeep gani haloson sila nga may madala pauli sa ila pamilya.
Nagalain man ang ila buot nga ginapasibangdan sila nga nagatuga sang traffic bangud para sa iya, ginahimo lang sila nga rason sang iban nga transport alliance para malimitahan ang ila ruta.
Nahibaluan nga 25% lang sang mga units halin sa first town ang pasudlon sa Iloilo City sa full implementation sang Enhanced Local Public Transport Route Plan (ELPTRP).
