ILOILO CITY- Gintawag sang consultant sang Western Visayas Alliance of Transport Cooperative and Corporation, Incorporated nga misinformation nga 80 ka mga units sang jeep sa idalom sang Jeepney Operators and Driver Association of Oton ang nag-untat byahe bangud nagapamatok sa ginapahayag palpak nga implementasyon sang Enhanced Local Public Transport Route Plan sa Iloilo City.
Sa interview sang Bombo Radyo kay Mr. Perfecto Yap nga amo man ang president sang Association of Taxi Operators in Panay, iya ginpahayag nga sa ginatumod ni Raphael Alla, Presidente sang Jeepney Operators and Driver Association of Oton, nga numero sang units nga nag-upod sa strike, kalabanan diri ang unconsolidated gani indi gid man ang mga ini makabyahe.
Suno kay Yap, may yara sang nagabyahe subong sa amo nga ruta kag bastante ini agud ma-cater ang mga pasahero.
Dugang ni Yap, magluwas sa 20 ka units nga nagabyahe, may yara pa gid sang 15 ka back-up units nga sarang magbyahe kun kinahanglanon.
