ILOILO CITY- Nagalaum ang pamilya sang mag-asawa nga biktima sang hit and run sa Brgy. Pandac, Pavia, Iloilo, sa diin patay gid ang lalaki samtang pilason naman ang babayi, nga manindugan ang isa ka witness sa insidente agud magbaskog ang kaso batok sa suspek.
Ang ginbawian sang kabuhi amo si Rave Garcia, 33, samtang pilason naman ang asawa nga si Shefryl, 23, lunsay residente sang Brgy Onate De Leon Mandurriao, Iloilo City.
Sa interview sang Bombo Radyo kay alyas Toto, amay sang napatay, iya ginpahayag nga base sa inisyal nga pahayag sang testigo, ginhungod nga ginlasak sang pribado nga salakyan ang mga biktima.
Nahibaluan nga halin ang mag-asawa sa Mandurriao pakadto kuntani sa Brgy. Balabag, Pavia sakay sa ila nga mountain bike.
Base sa testigo, may natabo nga pagbinaisay sa tunga sang driver sang pribado nga salakyan kag sa lalaki nga biktima bag-o natabo ang pagbunggo.
Gindugang naman sang amay nga sa subong yara na sa 80% ang development sang kaso kag ginahulat pa nga maka-recover ang babaye nga biktima agud dalayon na nga makapasaka sang kaso.
Ang suspek ginapahayag nga nagaedad sang 50 tubtob 60 antos kag isa ka negosyante sa Calinog.
Nailo naman sa amay ang duha ka tuig pa lang nga kapid nga mga anak sang mga biktima.
