Nagpaguwa ang Philippine Institute of Volcanology and Seismology (Phivolcs) sang advisory para sa Bulkan Kanlaon bangud sa ginakabalak-an nga pag-ilig sang lahar sa mga alagyan sang tubig malapit sa amo nga bulkan sa Negros Island.
Gin-cite sang ahensya ang forecast sang Philippine Atmospheric, Geophysical, and Astronomical Services Administration ukon PAGASA para subong nga adlaw, Hunyo 6, kun sa diin may mabaskog nga pag-ulan nga magatupa sa Negros.
Paandam sang ahensya, kun mabaskog ang ulan, magasaka man ang volume sang lahar sa mga suba sa southern slopes sang Kanlaon nga amo man ang na-report nga apektado kahapon.
Base sa kumpirmasyon sang ahensya, apat ka mayor nga alagyan sang tubig ang nakitaan sang lahar kahapon nga amo ang: Tamburong Creek (nga yara sa Biak-na-bato kag Calapnagan, La Castellana); Intiguiwan River sa Guinpanaan kag upstream Baji-Baji Falls sa Cabacungan, La Castellana; Padudusan Falls, Masulog, Canlaon City; kag sa Binalbagan River.
Namensyonar man sa report nga naglapaw na ang lebel sini sa Tamburong Creek kag nagtipon sang pila ka sentimetros nga sediment sa mayor nga dalan sa Biak-na-Bato rason nga indi maagyan sang mga motorista.
Ini nga lahar ang nagsugod ‘la una kahapon sang hapon kag naglawig sang 25 minutos base sa seismic record
Bangud sa forecast sang pag-ulan subong nga Huwebes, nagpaandam man ang Phivolcs nga mag-aligmat ang mga komunidad nga malapit sa mga suba sa southern Kanlaon.
Gina-abisuhan man ini nga mga komunidad nga magpadayon sa pag-monitor sa weather conditions kag magpatigayon sang preemptive response measures para sa safety samtang nga wala pa nagakalma ang bulkan nga subong nagapabilin pa sa Alert Level 2.
(Mt. Kanla-on Natural Park/Photo)
