Imbestigaran man sang Bureau of Internal Revenue (BIR) ang kontrobersyal nga si Bamban, Tarlac Mayor Alice Guo nga gina-alegar isa ka Chinese spy kag may kaangtanan sa iligal nga mga aktibidad sang Philippine Offshore Gaming Operators (POGOs).
Suno sa ahensya, si Commissioner Romeo Lumagui ang nagmandu sang imbestigasyon kasunod sang mga ginpangbuyagyag nga pangalan kag mga kumpaniya kadungan sang Senate investigation sa ginaalegar nga human trafficking kag criminal activities nga naangot sa offshore gaming operations sa Bamban.
Pahayag pa sang statement, sundon ang due process kag pananglitan makit-an nga ang income nga na-deklarar sa BIR ang wala naga-santo sa value sang propiedad sa taxable years, ipasaka ang kaso-kriminal bangud sa tax evasion.
Nagpaandam man ang commissioner nga ini man nga kaso ang posible ipasaka batok sa conspirators kag corporate officers sang mga kumpaniya nga gingamit agud makatipon sang manggad.
Ginsiling man sang tax bureau nga gina-abi-abi sini ang tanan nga informants nga makahatag sang nagakaigu nga dokumento kag ebidensya kaangot kay Guo kag sa mga kumpaniya nga involved.
Base sa mga dokumento nga natipon ni Sen. Risa Hontiveros, chairperson sang Committee on Women, Children, Family Relations and Gender Equality, nagapanag-iya si Guo sang 16 ka mga salakyan.
Apang si Guo nga nagapanindugan nga isa lamang ka simple nga tawo ang nag-insister nga indi na ini iya asset kundi kabahin sang buy-and-sell business sang Westcars kun sa diin isa siya ka incorporator.
Ginsiling man sang 37-anyos nga alkalde nga may yara siya sang piggery, meat shop, farms, kag embroidery business kag ini tanan nga negosyo ang iya nasudlan paagi sa bulig sang iya amay nga naghatag sa iya sang kuwarta.
Sa separado nga impormasyon, ginapahayag nga sang 2023 pa lamang, ang local office sang BIR sa Tarlac ang nag-flag na sa real estate company ni Guo kag sa duha ka POGO bangud sa failure to file returns.
