Gina-imbestigaran na sang Philippine National Police (PNP) ang isa ka post sang isa ka babaye nga naga-claim nga nag-hire sang Highway Patrol Group (HPG) personnel ang iya bana agud nga mag-escort sa iya agud indi ini maipit sa nagapug-ok nga trapiko.
Ini ang Instagram story sang social media “influencer” nga si Mary Joy Santiago kun sa diin may laragway pa sang HPG officer.
“How can I settle for less when my husband hired a [an] HPG escort para lang hindi ako ma traffic sa pupuntahan ko (so I don’t get [stuck in] traffic where I’m going)? (+ have my own driver and car),” pahayag sa caption.
Sa baylo nga dayawon ini sang publiko, napuno ini sang pagpakamalaot kag gintawag nga padayaw-dayaw kag abuso sa gahum.
Ini bangud ang HPG isa ka government-managed organization nga nagapasigurado sang road safety sa Pilipinas kag nagapatuman sang layi kag regulasyon sa trapiko.
Pahayag naman sang talatapan, wala sini gina-tolerar ang anuman nga involvement ukon endorsement sang escort-for-hire services. Ginsaad man sa statement nga pasakaan sang kaso-kriminal kag kaso-administratibo kun mapamatud-an nga ginlapas matuod sang personnel ang protocol.
“An investigation is already undertaken to determine the veracity of the recent viral posts and misunderstanding related to this matter,” saad nga statement nga ginpaguwa kahapon, Hunyo 8.
Gin-athag man sang HPG nga pananglitan isa ka malisyoso lamang nga impormasyon ang gin-post batok sa ila organisasyon, ipasaka man ang nagakaigu nga cyber-crime charges batok sa naghimu-himo sini.
“We will file the necessary cyber-crime related offenses to those individuals who will post any malicious statements that will malign/tarnish the image of the HPG and the possible criminal and administrative charges for or personnel,” dugang sa statement.#
