Ginklaro sang National Security Council (NSC) nga indi na kinahanglan sang Pilipinas nga maglisensya pa sa China antes ini magkadto sa Ayungin Shoal sa West Philippine Sea.
Sabat ini ni NSC Adviser Secretary Eduardo Año matapos nagpaguwa sang statement si Chinese foreign ministry spokesperson Mao Ning nga tugutan man sang China ang Pilipinas nga magdul-ong sang suplay kag mag-evacuate sang personnel sa Ayungin Shoal sa kondisyon nga mapahibalo lang ini sa Beijing sang abanse.
Ang Ayungin Shoal ukon ang Second Thomas Shoal ang nahamtang 120 nautical miles halin sa Palawan kag klaro nga sulod sa exclusive economic zone sang Pilipinas apang gina-claim ini sang China kag ila ginatawag nga Ren’ai Jiao.
Gintawag naman ni Año nga “absurd, nonsense and unacceptable” ang pahayag sang opisyal sang China.
Sunod sini nga ginsulit nga may sovereign rights kag hurisdiksyon ang Pilipinas sa Ayungin Shoal nga teritoryo sang pungsod base sa international law kag sa 2016 Arbitral Award. Pahayag pa sang tiglikom, kun ano man ang aktibidad sang Pilipinas sa Ayungin, wala na sang kinahanglanon nga approval halin sa China.
“We reaffirm our commitment to uphold our sovereign rights and jurisdiction over Ayungin Shoal, which is well within our EEZ as recognized by international law and the 2016 Arbitral Award. We do not and will never need China’s approval for any of our activities therein,” pahayag ni Año.
Matandaan nga nagpalabtik pa ang Beijing nga indi na maghimo sang palusot ang Pilipinas agud magdala sang construction materials agud makay-o ang BRP Sierra Madre.
“However, the Philippines may not use this as an excuse to transport materials of construction to its naval vessels in an attempt to permanently occupy Renai Reef [Second Thomas Shoal],” kabahin sang nangin statement ni Mao sang nagligad nga adlaw.
Ang pinakaulihi nga natabo sa amo nga teritoryo amo ang pagbalabag sang China Coast Guard (CCG) sa sakayan sang Pilipinas kun sa diin may sakay nga Pinoy nga soldado nga nagamasakit kag kinahanglan dal-on sa ospital. Antes sini, may reports man nga ginpangkuha sang China ang pagkaon kag medical supplies nga iya kuntani sang mga Pilipino nga soldado nga naka-estasyon sa BRP Sierra Madre.#
