JANIUAY, ILOILO – All set na ang West Visayas State University (WVSU) Janiuay Campus sa pagtiglawas sang Western Visayas sa patigayunon nga Philippine ROTC Games 2024.
Sa interview sang Bombo Radyo kay Sergeant Maria Christina Postrado, Reserve Training Instructor sang Philippine Airforce Reserve Officers’ Training Corps, iya ginpahayag nga gindeklarar sila nga over-all 2nd place sa ginpatigayon nga ROTC Games Visayas Leg nga ginpatigayon sa Bacolod City sang Mayo 26 tubtob Hunyo 1.
Suno kay Postrado, sa nasambit nga hinampang, nakuha nila ang 8 gold, 13 silver kag 9 bronze medals sa nagakalain-lain nga sporting events.
Wala naman sila nagalaom nga sa sulod sang duha ka semana nga training, mangin maayo ang resulta sang hinampang.
Sa subong, nagahanda na sila sa pagtiglawas sang Western Visayas sa National Leg nga patigayunon sa Agusto 18 tubtob 24 sa Cavite City.
