Naghimo na liwat ang South Korea sang propaganda broadcasts batok sa North Korea sa labing-una nga tion sa sulod sang anum ka tuig bilang balos sa ginhimo sang North nga pagpalupad sang mga balloon sa South nga nagaunod sang mga basura kag higko.
Sang weekend, ginapahayag nga 300 gid ka North Korean balloons ang na-detect kag ginabanta 80 diri ang nakaabot gid sa teritoryo sang South kun sa diin nakit-an nga may unod nga scrap paper kag plastic sheets.
Sang nagligad nga bulan, matandaan nga nagpadala man ang North sang 200 balloons nga may unod nga mga basura bilang pagtumalos man sa propaganda leaflets nga gin-alegar halin man sa south.
Bangud sini, ginkumpirma sang South Korea Joint Chiefs of Staff nga nag-conduct sila sang loudspeaker broadcast kahapon sang hapon apang wala ginsapubliko kun diin nga areas ini gin-play.
Ini nga tikang ang ginalantaw nga magapasingki pa sang kaakig sang North rason nga nagpatawag na sang meeting ang defense minister sa top military commanders para preparahan ang balos sang North nga posible isa na ka direct military action.
Matandaan nga sang 2015, sang nagpatigayon ang South sang loudspeaker broadcasts sa labing-una nga tion sa sulod sang 11 ka tuig, nagpalupad ang North sang artillery rounds sa border rason nga nagbalos man ang South apang wala sang reported nga casualties.
Ginakabig sang Pyongyang ang “loudspeaker propaganda broadcasts” bilang isa na ka akto sang gyera.
Ini nga broadcasts nga amo man anay ang taktika nga gingamit sang 1950-1953 Korean War ang nagaunod sang mga balita halin mismo sa South kag North Korea kag sa luwas sang pungsod, mga impormasyon kaangot sa demokrasya kag kabuhi sa South, kag may yara pa sang popular K-pop music.
Gina-claim sang South Korean military nga ini nga broadcasts ang mabatian bisan 10km na ang kalayuon halin sa border kun adlaw kag 24km ang kalayuon kun gab-i.
