Wala na-istoryahan ang kontrobersyal nga Charter Change kadungan sang labing-una nga official meeting nanday Senate President Francis ‘Chiz’ Escudero kag House Speaker Martin Romualdez kaupod ang iban pa nga mga lider halin sa Senado kag Kamara.
Suno kay Romualdez, natutukan sa ila pagsinapol ang amendments sa Rice Tarrification Law nga isa ka top priority sang Marcos Jr. administration.
Ginsulit sini ang mayor nga katuyuan sang House Bill 10381 nga amo ang magapabaskog sang buffer stocking authority sang gobyerno kag magbalik sa pila ka nadula nga functions sang National Food Authority (NFA) para makahatag sang dekalidad apang barato nga bugas sa mga Pilipino kag mapasaka pa ang income sang Filipino farmers.
Pila pa ka priority measures ang na-istoryahan sang duha ka lider halin sa upper kag lower chambers, apang talalupangdon nga wala ang Resolution of Both Houses 7 nga aprubado sang Kamara lakip na ang bersyon sini sa Senado.
Ginpahayag naman ni Escudero nga produktibo ang ila una nga meeting.
Ginkasugtan man suno sa iya nga ipaiway na ang indi paghangpanay sa Kamara kag Senado kasunod sang word war nga nagluntad anay bangud sa proposed Charter change paagi sa people’s initiative.
Magluwas kanday Escudero kag Romualdez, present man sa meeting kahapon, Hunyo 13, sanday Senate Majority Leader Francis Tolentino, House Senior Deputy Speaker Aurelio Gonzales Jr., House Deputy Speaker David Suarez, kag House Committee on Appropriations Chairman Zaldy Co.
Ang masunod nga pagsinapol suno kay Escudero ang maga-sentro naman sa preparasyon para sa ikatatlo nga State of the Nation Address (SONA) ni President Ferdinand Marcos, Jr. nga nakatalana sa Hulyo.
