Ginpabaskog pa sang Department of Trade and Industry (DTI) ang strategic enforcement efforts sini agud nga indi mapasulod sa Pilipinas ang iligal nga vape products ilabi na kasunod sang labing-una nga na-rekord nga kamatayon sa pungsod bangud sa vape-related lung injury.
Suno kay DTI Secretary Alfredo Pascual, hugot nga ginadumulian ang pagbaligya kag pag-market sang vape sa kabataan sa idalom sang vape law, apang base sa mga ebidensya, madamo gihapon sa vape industry players ang nagagamit sang marketing strategies nga ang target amo ang kabataan.
Suno naman sa Fair Trade Group, ginatinguhaan nila nga masigurado gid nga ang manufacturers, importers, distributors, kag retailers sang vape products ang lunsay compliant gid sa layi.
Para malikawan nga makagamit ang mga menor de edad sini nga mga produkto, ang Fair Trade Enforcement Bureau ang nagpakig-angot na sa advocacy groups kaangay sa Health Justice Philippines, Social Watch Philippines, Philippine Legislators’ Committee on Population and Development (PLCPD), Child Rights Network (CRN), kag Campaign for Tobacco-Free Kids (CTFK) paagi sa dayalogo para makahimo sang initiative strategies para matapna ang problema sa youth vaping.
Nahibaluan nga sa idalom sang Vape Law, ang DTI ang may mayor nga hurisdiksyon sa regulasyon sang vapes kag iban nga novel tobacco products kag nag-assign man sang complementary roles sa Department of Health, Food and Drug Administration, Department of Social Welfare and Development, Department of Education, Bureau of Internal Revenue kag local government units.
