Balik na sa home floor sang Boston Celtics sa Massachusetts, USA ang Game 5 sa 2024 NBA Finals.
Posible nga diri na tapuson sang Celtics ang best-of-seven series kag makuha na ang ila ika-18 nga franchise championship, apang posible man nga indi ini pagpasugtan sang Dallas Mavericks kag suliton sini ang natabo sa Game 4 sa American Airlines Center.
Sa amo nga hampang, ginlutos nanday Luka Doncic ang team ni Jayson Tatum paagi sa 38-point margin of victory nga amo ang ikatatlo sa pinakadaku sa NBA Finals history.
Nagpanguna ang Slovenian superstar nga may 29 points (25 in the first half), five assists, five rebounds kag three steals, samtang si Kyrie Irving naman ang nakadugang sang 21 points kag six assists.
Pananglitan magdaog ang Boston sa Game 5, magapangibabaw na sila sa may pinakadamo nga kampyonato sa bug-os nga maragtas sang NBA. May labaw na sila nga isa sa Los Angeles Lakers nga may yara subong sang 17 ka championship trophies.
Magasugod ang Game 5 buwas, 8:30 sa aga, oras sa Pilipinas.
