Ginklaro sang National Task Force for the West Philippine Sea nga indi sakayan sang Pilipinas ang nagbunggo sa barko sang China sa kadagatan malapit sa Ayungin Shoal.
Sa statement sang task force, ginsiling nga ang People’s Liberation Army-Navy, China Coast Guard, kag Chinese Maritime Militia vessels ang naghimo sang delikado nga mga hulag lakip ang “ramming” kag “towing.”
Gindugang man sang task force nga ginakondenar sini ang iligal kag agresibo nga aktwasyon sang Navy, Coast Guard, kag militia vessels sang Beijing nga rason kun ngaa nabutang sa risgo ang kabuhi sang mga Pinoy kag nahalitan pa ang Philippine vessels.
Gintawag man ini nga maathag nga paglapas sa international law partikular na sa United Nations Charter, United Nations Convention on the Law of the Sea (UNCLOS), kag sa 2016 Arbitral Award.
“We strongly condemn the illegal, aggressive, and reckless actions of the PLA-N, CCG, and CMM. Their actions put at risk the lives of our personnel and damaged our boats, in blatant violation of international law, particularly the United Nations Charter, the United Nations Convention on the Law of the Sea (UNCLOS), and the 2016 Arbitral Award,” kabahin sang statement.
Nakasaad man diri nga nagpakita gid sang propesyunalismo ang mga Filipino personnel, ginlikawan nga magsaka ang tensyon, kag nagpadayon na lang sa mission apisar pa sang ginhimo sang China.
“It is our expectation that China, as a member of the international community, would also do the same. The AFP and PCG remain steadfast in upholding Philippine sovereignty, sovereign rights, and jurisdiction in the West Philippine Sea,” dugang sa statement.
Lunes sang aga sang una nga gin-anunsyo sang China Coast Guard nga nagbungguanay ang mga mga sakayan sang Pilipinas kag China bangud ginpalapitan sang Philippine supply boat ang Chinese ship.
Ginpasibangdan man sang China ang barko sang Pilipinas nga iligal nga nagsulod sa ila teritoryo apisar pa sulit-sulit sila nga nagpaguwa sang warning.
May inisyal nga impormasyon nga isa ka Pinoy nga soldado ang nasamaran bangud sa natabo nga pagbungguanay. Gina-verify ang impormasyon nga ginpatigayon ang medical evacuation kasunod sang amo nga hitabo kadungan sang resupply mission.
Nahamtang ang Ayungin Shoal sa 105 nautical miles west sang Palawan, sulod pa sa 200-mile exclusive economic zone (EEZ) kag sa continental shelf sang Pilipinas — apang gina-claim man sang China.
