ILOILO CITY- Ginpa-Bombo sang isa ka senior citizen ang Molo Health Center bangud sa pagpamalibad sini nga maghatag sang medical certificate agud gamiton kuntani sang tigulang sa pagpangayo sang financial assistance para sa iya anak nga nagasuprir sang tuberculosis.
Sa interview sang Bombo Radyo kay Susan Esler,64,residente sang North Baluarte, Molo, iya ginpahayag nga duha na ka bulan nga nagabalik-balik siya sa health center apang masami nga wala sang doctor kag madamo lang sang balibad ang staff.
Suno kay Esler, nagbalik man ini agud mangayo sang nasambit nga certificate apang wala sini ginsugid nga sa opisina ni Iloilo City Lone District Representative Julienne Baronda bangud nga nahibaluan man sini nga kontra-partido ang mga staff sang health center.
Nahibaluan nga wala man sang trabaho ang tigulang samtang ang anak sini nga 46-anyos nga may tuberculosis ang nagabyahe lang sang trisikad bilang palangabuhian.
Sang ginpadulungan naman sang Bombo Radyo ang health center, gin-schedule na nila bwas, Hunyo 20,ang paghatag sang medical certificate kay Esler.
