ILOILO CITY- Ginahandaan na sang Iloilo Provincial Government ang posible pagtimbuok sang kaso sang dengue kun sa diin mahimo magginutok ang mga pasyente sa mga district hospitals.
Suno kay Provincial Administrator Dr. Raul Banias, isa sa ginahimo nila subong nga pagpanghanda amo ang posible nga pag-convert sa Iloilo Sports Complex sa La Paz agud mangin temporary nga health facility.
Pahayag ni Banias, ini nga contingency plan ang magaakomodar sa nagasolobra nga pasyente gikan sa 13 ka mga district hospitals lakip na ang Iloilo Provincial Hospital sa Pototan.
Base sa data sang Provincial Health Office, may malapit 20 ka dengue patients ang naadmit sa pila ka district hospitals.
Sa kabilugan may yara sang kapin 1100 ka kaso sang dengue sa probinsya.
Ang Lambunao ang may pinakamataas nga kaso nga may 77 kalakip na ang isa ka napatay.
May natumod man nga hotspot sa Odiongan, Badiangan nga may 13 ka kaso.
Matandaan nga sang COVID-19 pandemic, ang sports complex nagserbe nga quarantine area bangud sa nagasololobra nga pasyente sa district hospitals.
