Ginkumpirma sang Olympic Committee of Serbia nga magahampang ang 24-time Grand Slam winner nga si Novak Djokovic sa Paris Olympics.
Ini na ang iya mangin ika-lima nga pagtapak sa Olympiada halin sang nagpasakop ini sang 2008 sa Beijing kag nakadaog sang bronze medal.
Sang nagligad nga bulan, nagpaidalom sa surgery ang 37-anyos nga tennis superstar kasunod sang pag-atras sini sa French Open bangud sa injury nga naangkon sa fourth-round win sini nga amo man ang nagbutang sa duha-duha kun makahampang siya sa Wimbledon kag Paris Games.
Kasunod sang iya pag-withdraw sa Roland Garros, nagnubo si Djokovic sa number three sa world ranking. Tuyo sini nga tapuson ang iya title drought sa 2024 matapos nadag-an ang tatlo sa apat ka Grand Slams subong nga tuig.
Gold medal ang target sini sa Paris Games. Sang 2023, nasaad sini nga ang pagdaog sang bulawan sa Olympiada ang isa sa iya mayor nga ambisyon sa iya nga karera.
