Nagbalik na sa iya winning form ang Filipino pole vaulter nga si Ernest John “EJ” Obiena samtang nagahilapit ang Paris Olympics kun sa diin isa siya sa ginasaligan nga makadala-pauli sang medalya para sa Pilipinas.
Sa Irena Szewinska Memorial sa Bydgoszcz, Poland, na-rehistro ni Obiena ang pinakamataas sini nga clearance subong nga tuig matapos nalukso ang 5.97m sa isa lamang ka attempt.
Ini man ang ikaduha nga gold medal sang World no. 2 nga pole vault star sa outdoor season kag ikatatlo naman nga podium finish sa pangkabug-usan.
Nagpangaduha kay Obiena si Emmanouil Karalis sang Greece nga naka-rekord man sang iya personal-best nga 5.92m, samtang bronze medalist naman si Piotr Lisek sang Poland nga naka-clear sang 5.75m.
Matandaan nga antes sini, pila ka beses nga nabali ang pole ni Obiena. Sa pagbukas sang outdoor season, nakuha sini ang gold sa Los Angeles Grand Prix sa United States, apang nagsarurot sa pang-pito sang nabali ang iya pole sa Ostrava Golden Spike sa Czech Republic.
Amo man gihapon ang natabo sa Oslo Bislett Games sa Norway apang nakahingabot pa ini kag nakabulsa sang silver, apang pag-abot sa BAUHAUS-galan sa Sweden subong nga Hunyo, nagpang-pito lang liwat ang Filipino Olympian kag naggamit pa sang hinulaman nga pole.
Subong nga may bag-o na siya nga ginagamit, na-clear sini ang 5.55m, 5.75m, 5.82m, 5.87m, kag 5.97m sa combined six attempts sa Poland.
Sa isa ka Instagram post, ginkumpirma man ni Obiena nga magabalik siya sa hampang sa Hunyo 23 sa isa naman ka tournament.
Magluwas kay Obiena, ang iban pa nga mga Pilipino nga magarepresentar sang Pilipinas sa Paris Olympics amo ang gymnasts nga sanday Carlos Yulo, Aleah Finnegan, Levi Ruivivar kag Emma Malabuyo; boxers nga sanday Carlo Paalam, Nesthy Petecio, Aira Villegas, Hergie Bacyadan, kag Eumir Marcial; rower nga si Joanie Delgaco; weightlifters nga sanday Vanessa Sarno, John Ceniza kag Elreen Ando; kag fencer nga si Sam Catantan.
