Nagapati ang Criminal Investigation and Detection Group (CIDG) nga posible nga “souvenirs” lamang nga ginagamit sang foreign workers ang mga ginaalegar uniporme sang Chinese military nga nakit-an sa sulod sang Philippine Offshore Gaming Operator (POGO) hub sa Pampanga.
Sa una nga reports, ginsiling nga ini nga uniforms ang nakit-an sa dorms, villas, kag mga opisina sa amo nga compound.
Suno kay Maj. Gen. Leo Francisco, chief sang CIDG, apat ka sets sang uniporme ang nakit-an. Bisan ginapatihan nga souvenirs lang ini, wala ginadula ang iban nga posibilidad kun ngaa ara didto ang amo nga uniporme.
“There are four sets of military uniforms, and as of today, it seems they are souvenirs used by Chinese nationals in the Porac hub, but we are not discounting the possibility that there is another reason why the military uniforms are here,” suno kay Francisco.
Una na nga ginkumpirma sang spokesperson sang Presidential Anti-Organized Crime Commission nga si Winston Casio nga sa amo nga Pogo hub, may nakit-an man nga dokumento nga may pangalan ni anay presidential spokesperson Harry Roque, may People’s Liberation Army (PLA) uniforms, may “outstanding service medal” para sa Chinese military sergeant, military pins, kag duha ka pares sang botas.
Una man nga ginpahayag sang talatapan nga posible nga military collection lamang ang amo nga uniporme apang possible man nga may Chinese military nga nagapadalagan ukon yara sa amo nga Pogo hub.
Sang gin-conduct ang joint raid sa amo nga hub duha ka semana na ang nagligad, matandaan nga nadakpan ang 190 ka mga tawo nga kalabanan Chinese nationals.
