ILOILO CITY- Nahimo pa nga 20 ka mga atleta ang magabug-os sa Philippine delegation para sa 2024 Paris Olympics matapos nag-qualify ang dugang nga tatlo ka mga atleta sa martials arts kag swimming.
Gin-anunsyo sang Philippine Olympic Committee (POC) nga natigayon nanday judoka Kiyomi Watanabe kag swimmers Kayla Sanchez kag Jarod Hatch nga malab-ot ang rekisitos para makuha ang tickets para sa Summer Games.
Si Watanabe ang magahampang para sa iya ikaduha nga sunod-sunod nga Olympic appearance matapos sang Tokyo edition sang 2021, kun sa diin nag-compete ini sa women’s 63kg division.
Si Sanchez naman ang maga- compete sa women’s 100 meters freestyle samtang si Hatch ang magalangoy sa men’s 100 butterfly.
Suno kay Philippine Swimming Inc. (PSI) secretary Eric Buhain , ila gin-nominate sanday Sanchez kag Hatch paagi sa universality places.
Ginpahayag naman ni POC president Abraham “Bambol” Tolentino nga may ginapaabot pa sila nga dugang nga atleta nga magalupad padulong sa France agud itiglawas ang Pilipinas sa Olympiada.
