ILOILO CITY – Ginbulgar ni anay Iloilo City Lone District Representative kag subong Iloilo City Mayor Jerry Treñas nga napilitan lang ang House Committee on Justice nga magpatigayon sang imbestigasyon sa ginapahayag drug case ni anay Senator Leila De Lima bangud sa kahadlok kay anay Presidente Rodrigo Duterte.
Si Treñas nga anay kongresista ang myembro sang House Committee on Justice nga nagpanguna sa ginapahayag kaangtanan ni De Lima sa pagduging sang iligal nga droga sa New Bilibid Prison.
Sa interview sang Bombo Radyo kay Treñas, iya ginpahayag nga apisar myembro siya sang nasambit nga komitiba, wala siya nagatambong sa mga hearing.
Apisar nagapamalabag siya sa natabo, ginpahayag sang alkalde nga indi niya mahimo nga kontrahon ang nagligad nga administrasyon.
Ginpahayag ni Treñas nga naintindihan niya ang kabudlay sa presuhan, bangud nakaagi man ini napreso sadto.
Sa pihak sini, nagpalab-ot man sang pagpanginbulahan si Treñas kay De Lima matapos ma-acquit sa iya pinakaulihi nga drug case.
“I am so glad that Sen de lima has finally been acquitted. While I was a member of the justice committee at that time, I did not participate in the hearings in the house. I did not agree to the same but cannot go against the administration at that time,” pahayag ni Treñas.
Matandaan nga ginpaboran sang Muntinlupa City Regional Trial Court Branch 206 ang “demurrer to evidence” ni De Lima, rason nga na-absuwelto ini sa iya drug case.
Bangud sa desisyon sang korte, ginbasura na ang tanan nga mga kaso nga gin-file batok kay De Lima sa idalom sang Duterte administration.
