Ginklaro sang National Economic Development Authority (NEDA) nga wala ini sang intensyon nga limitahan ang pagsulod sang Chinese investors kag mga turista sa Pilipinas apisar pa sang mas nagasingkal pa nga tensyon sa tunga sang Beijing kag Manila sa isyu sang West Philippine Sea.
Suno kay Socioeconomic Planning Secretary Arsenio Balisacana, bukas gihapon ang pungsod sa anuman nga nasyon nga gusto mag-invest.
“We have no intention of restricting investments or tourists from China. Everyone is open to come to the country as investors or as tourists,” suno sa tiglikom.
Sa record sang Bangko Sentral ng Pilipinas (BSP), nagalab-ot sa $1.89 million ukon P111.35-million ang Chinese foreign direct investments sa Pilipinas sa una nga quarter sang 2024 nga may pagnubo nga 73.24 percent halin sa $7-million ukon P412.41-million nga kontribusyon sini sa una nga tatlo ka bulan sang 2023.
Ginpahayag ni Balisacan nga bisan may nakit-an nga pagnubo sa Chinese investments sa Pilipinas, indi ini direkta nga maangot sa away sa West Philippine Sea.
May iban pa nga rason nga nagaapekto sa world trade kag economy suno sa tiglikom kaangay sang giyera sa Gaza kag sa Ukraine.
“Nobody is spared from these global and regional tensions. Our global performance could have been admittedly better if the global trade has been more favorable than it is,” paathag ni Balisacan.
Suno naman sa data sang Department of Tourism (DOT), halin sang Enero-Mayo subong nga tuig, yara sa 168,628 Chinese tourists ang nakasulod sa Pilipinas.
Katumbas ini sang 6.56 percent sang tourist arrivals sa una nga lima ka bulan sa 2024 nga mas manubo sa 682,362 South Koreans (26.56 percent) kag 403,721 Americans (15.71 percent) nga nakapadulong sa Pilipinas sa amo man nga period.
