ILOILO CITY- Nagaamat-amat na sanaaw ang imbestigasyon sang Jaro Police Station natuhoy sa kamatayon sang isa ka miyembro sang LGBTQIA+ community nga si alyas “Vic” nga nasapwan patay sa iya apartment sa Lady of Lourdes sa distrito sang Jaro, Iloilo City.
Nakita sa autopsy sang biktima nga hungod ini nga ginpatay kon sa diin ginlampusan siya sa ulo sang pila ka beses kag dead on the spot gid ini.
Sa interview sang Bombo Radyo kay Police Captain Melchor Tolentino, hepe sang Jaro Police Station, iya ginpahayag nga ulihi nila na-trace nga nagsulod ang suspek sa San Lorenzo Subdivision, Loboc, La Paz base sa nakuha nga footage sa Close Circuit Television (CCTV).
Suno kay Tolentino, daw kaangay nga ginapatalang sila sang suspek bangud nga madamo nga lusot-lusot ang ginpang-agyan sini para indi ini madakpan.
Nahibaluan nga may ginakaptan na ang otoridad nga imahe sang suspek, apang wala pa nila ini ginpagwa.
