Na-establisar na nga isa lang ka persona sanday suspended Bamban, Tarlac Mayor Alice Guo kag ang Chinese national nga si Guo Hua Ping matapos natukiban sang National Bureau of Investigation (NBI) nga nagasanto ang ila nga fingerprints.
Ang nagsapubliko sini amo si Senator Risa Hontiveros nga amo mismo ang nag-request sa ahensya para ikumparar ang fingerprints sang duha.
Ginkumpirma man ni NBI director Jaime Santiago nga amo ini ang nakasaad sa ila nga dactyloscopy report matapos ang comparative examination and analysis nga ginhimo sang NBI Organized and Transnational Crime Division.
Suno kay Santiago, ginhimo ang examination sang Hunyo 25-27 sa Dactyloscopy Division sang ahensya sa Quezon City.
Pahayag naman ni Senator Hontiveros, pamatuod ini sa madugay na ginasuspetsahan nga peke nga Pilipino si Mayor Guo bangud ang iya matuod nga identity amo si Guo Hua Ping nga nagasuksok lamang sang maskara sang Filipino citizen agud nga makapasilidad sang krimen nga ginahimo sang Philippine Offshore Gaming Operator ukon POGO sa pungsod.
Ginpahayag ni Hontiveros nga ang findings sang NBI amo ang pinakamabaskog nga ebidensya agud nga dalayon nga makakas si Alice Guo sa pagka-alkalde sa Bamban kag manabat sa mga krimen nga iya nahimo amo man sang Pogo hub nga iya ginbuligan.
“Napakalaking insulto ito sa mga botante ng Bamban, sa mga institusyon ng ating gubyerno, at sa bawat mamamayang Pilipino. Ito na ang pinakamabigat na ebidensya para palayasin na sa pwesto si Mayor Alice,” statement ni Hontiveros.
“I call on the Office of the Solicitor General to expedite its filing of a quo warranto case against her. Dapat mapanagot siya sa lahat ng krimen na ginawa niya at ng kanyang POGO hub. This revelation is not the end. Guo Hua Ping, soon, we will know the full extent of your deception… We will dig deeper and locate the systemic roots of our POGO problem,” dugang sini.
Matandaan nga sang Hunyo 26 nga hearing sang Senate committee on women, children, family relations and gender equality, ginpresentar man ni Hontiveros ang NBI clearance sang babaye nga ang pangalan Alice Leal Guo, pareho ang birth province kag birthday sa mayor sang Bamban apang tuman ka layo ang itsura. Ang amo nga pamatuod ang nagpataas sang kahangawa nga ginkawat ni Guo ang identity sang isa ka Filipino.
Matandaan nga ang una naman nagpresentar sang dokumento halin sa Board of Investments (BOI) kag Bureau of Immigration amo si Senator Sherwin Gatchalian kun sa diin nakasaad nga ang matuod nga pangalan ni Alice Guo amo si Guo Hua Ping nga nabun-ag sang Agusto 31, 1990 kag nagsulod saPilipinas sang Enero 12, 2003 ukon sang tion nga naga-edad na siya sang 13-anyos.
Nagaguwa man sa hearing sang Senado nga indi lang si Mayor Guo ang nagpangawat sang identity sang Pilipino bangud ginalantaw man nga ginpang-peke sini ang iya incorporators sa Pogo hub nga Hongsheng Gaming Technology.
Ang isa amo mismo ang nag-atubang sa Senate hearing nga si Merly Joy Castro nga nag-alegar nga nakibot na lang siya kun ngaa nadala siya sa ginkasuhan bangud sa involvement sini sa Hongsheng.
Ginpahayag man sini nga ang iban nga nalista nga pangalan bilang incorporators sa Pogo ang sa pagkamatuod nagatrabaho lamang bilang mga manugbaligya sa pampubliko nga merkado sa Tarlac.
Una naman nga ginpahayag sang Philippine Statistics Authority nga naghulag na ini agud ikanselar ang certificate of live birth ni Guo nga kun maaprubahan, buot silingon, makakasan ini sang iya gin-angkon nga Filipino citizenship.
