Magahulag gilayon ang Office of Solicitor General (OSG) agud mapasaka ang quo warranto case batok kay suspended Bamban, Tarlac Mayor Alice Guo matapos nga ginkumpirma sang National Bureau of Investigation (NBI) nga nagsanto ang iya fingerprints sa Chinese passport holder nga si Guo Hua Ping.
Suno kay Solicitor General Menardo Guevarra, isa ka “breakthrough” ang natukiban sang NBI nga amo man ang ginahulat sang talatapan.
Ini suno kay Guevarra ang nag-athag sa madamo nga mga pamangkot nga nagalibot sa matuod nga identity sang alcalde particular na ang iya nga citizenship.
“As soon as possible” suno sa natungdan nga i-file nila ang legal action.
“We’re revising our existing drafts in the light of the NBI finding,” dugang sini.
“If she misrepresented herself under oath or made false statements in her certificate of candidacy and related documents, she may be held criminally liable for perjury or falsification, aside from being ousted from public office through the proper proceedings,” pahayag pa sang opisyal.
Una na nga ginpahayag sang NBI nga ginhimo nila ang examination sa fingerprints sang Hunyo 25-27 sa Dactyloscopy Division sang ahensya sa Quezon City kasunod sang request ni Senator Risa Hontiveros.
Pahayag naman ni Senator Hontiveros, pamatuod ini sa madugay na ginasuspetsahan nga peke nga Pilipino si Mayor Guo bangud ang iya matuod nga identity amo si Guo Hua Ping nga nagasuksok lamang sang maskara sang Filipino citizen agud nga makapasilidad sang krimen nga ginahimo sang Philippine Offshore Gaming Operator ukon POGO sa pungsod.
Ginpahayag ni Hontiveros nga ang findings sang NBI amo ang pinakamabaskog nga ebidensya agud nga dalayon nga makakas si Alice Guo sa pagka-alkalde sa Bamban kag manabat sa mga krimen nga iya nahimo amo man sang Pogo hub nga iya ginbuligan.
Una naman nga ginpahayag sang Philippine Statistics Authority (PSA) nga naghulag na ini agud ikanselar ang certificate of live birth ni Guo nga kun maaprubahan, buot silingon, makakasan ini sang iya gin-angkon nga Filipino citizenship.
Matandaan nga sang nagligad nga semana, nagpasaka man ang PNP Criminal Investigation and Detection Group kag ang Presidential Anti-Organized Crime Commission sang nonbailable qualified human trafficking charge batok kay Mayor Guo bangud man sa illegal Pogo hub sa Bamban.
Sa amo nga complaint, ginkilala man ang alkalde bilang si “Guo Hua Ping”.
Antes ina, nag-una man ang Department of the Interior and Local Government sa pag-file sang administrative complaints batok kay Guo kag iban a nga municipal officials sa Bamban. Ang ginpasaka sa Office of the Ombusman nga administrative complaints pending resolution ang nagalakip sang grave misconduct, serious dishonesty, gross neglect of duty kag conduct prejudicial to the best interest of the service.#
