Suportado sang United Sugar Producers Federation (UNIFED) ang plano sang Department of Agriculture nga mag-import sang 200,000 metric tons sang refined sugar subong nga tuig.
Suno kay UNIFED President Manuel Lamata, ang imported nga kalamay amo anay ang magasabat sa kakulangan sa suplay antes mag-sugod ang harvest season sa Septyembre.
Maatrasar ang harvest suno sa natungdan bangud sa El Niño phenomenon — rason man nga sang ginkonsulta sila para sa sini nga importasyon, nagpasugot sila.
Sa separado nga statement, nagsiling naman ang National Federation of Sugarcane Planters ang nga plano sa pag-import sang kalamay amo na dapat ang “last resort” kag himuon lang kun tuman na gid ka kinahanglanon.
Una na nga ginpahayag ni Agriculture Secretary Francisco Tiu Laurel Jr. nga maabot sa Septyembre ang at least 200,000 tons sang imported refined sugar. Suno sa tiglikom, magakit-anay pa ang DA kag ang Sugar Regulatory Administration (SRA) sa masunod nga bulan agud nga ma-formalize ini nga plano.
Ginkumpirma man ni SRA Administrator Pablo Luis Azcona nga Enero pa sang ginplano ang importasyon kag pormal nga ginpirmahan sang Marso 8, 2024 sa idalom sang Sugar Order No. 2.
Sang Disyembre, matandaan nga ginpahayag ni Laurel nga ginakonsiderar sini nga limitahan lamang sa 200,000 metric tons ang importasyon sang kalamay subong nga tuig.
