Ginbuyagyag sang Philippine Amusement and Gaming Corp. (Pagcor) nga may yara sang anay high-ranking government official nga nagduso para sa pag-grant sang lisensya sa Philippine Offshore Gaming Operators (POGO) hubs nga nagahimo sang iligal nga mga aktibidad.
Wala ginpangalanan sang ahensya kun sin-o ang amo nga opisyal, apang ginkumpirma nga myembro ini anay sang Gabinete.
Suno pa sa regulator, ipaguwa ni Pagcor chairman and chief executive Alejandro Tengco ang pangalan sang ex-Cabinet official sa “proper forum” amo man ang mga sirkumstansya kun ngaa naglapta ang iligal kag kriminal nga offshore gaming operations.
Ginplastar man sang Pagcor chief nga ginahimo sang administrasyon ang tanan agud nga mapapas ang illegal operators rason man kun ngaa nagnubo na lamang ang licensees kun sa diin halin sa 298 sa previous administration, nagsarurot ini sa 43 licensees subong.
Nahibaluan nga sang naglinigad lamang nga sinemana sang natigayon ang raid sa Pogo hub sa Pampanga kag Tarlac kun sa diin nakit-an ang mga ebidensya sang criminal activities lakip na ang human trafficking, torture kag investment scams.
Ini man nga raid ang rason kun ngaa napadalman ang identity ni Bamban, Tarlac Mayor Alice Guo nga nagguwa nga amo man gali ang Chinese national nga si Guo Hua Ping.
