Nasiplatan ang isa ka Chinese aircraft carrier sa nakatundan nga bahin sang Luzon.
Suno sa report sang English-language Chinese newspaper nga Global Times, ang aircraft carrier sang People’s Liberation Army-Navy nga Shandong ang nag-abot 200 nautical miles ang kalayuon halin sa Luzon.
Ang Shandong amo ang ginapahayag nga most advanced aircraft carrier nga ginagamit sang China.
Suno sa satellite image nga gin-provide sang MizarVision nga isa ka Shanghai-based technology kag intelligence company, nakit-an ini nga nagalayag pa-naaminhan-nakatundan ang Luzon sa West Philippine Sea.
Mangin ang European satellite nga Sentinel-1 ang naka-detect man sa amo nga aircraft carrier nga nagapatrolya sa West Philippine Sea.
Kun basehan ang Sentinel-2, may nagbiya nga aircraft carrier sang nagligad nga semana sa Sanya, Hainan province nga amo ang homeport sang Shandong carrier.
Wala pa sang kumpirmasyon halin sa Chinese kag Philippine Defense departments kaangot sini.
Suno naman kay West Philippine Sea monitor Ray Powell nga isa man ka former officer sang US Air Force, mabudlay tumuron kun sa diin gid ang exact location sang sini nga aircraft carrier nga na-commission lamang sang 2019.
Ginatudlo nga rason amo ang automatic identification system (AIS) sang carrier nga ginpatay rason nga indi gilayon ma-detect.
Kun basehan ang reports sang Global Times, ang Shandong — nga isa sa duha ka aircraft carriers sa idalom sang fleet sang People’s Liberation Army-Navy — ang posible nga naga-layag bangud sa scheduled exercise bilang prepasyon sa potential voyage sini sa West Pacific Ocean.
Matandaan nga antes ini nga aircraft carrier sang China, nakit-an man sang Hunyo 17-Hunyo 27 ang pinakadaku nga barko sang China Coast Guard ukon ang monster ship nga nagalayag man sa exclusive economic zones sang Pilipinas, Malaysia kag Brunei.
