ILOILO CITY- Nagpanawagan ang China sa Pilipinas nga dakpon kag silutan ang mga indibidwal nga responsable sa pagpatay sa isa ka Chinese citizen sa isa ka kaso sang kidnapping nga nagtulod sa Beijing nga maghimo sang diplomatic intervention.
Magluwas sa Chinese citizen, isa man ka Chinese American ang ginpatay.
Suno sa Chinese Embassy sa Manila, kinahanglan nga imbestigaran sang Pilipinas ang kaso.
Apisar nga wala man ginabasol sang China ang otoridad sa Pilipinas, mahimo naman ini nga magpalas-ay pa sang relasyon sang duha ka pungsod kasunod sang pinakaulihi nga insidente sa West Philippine Sea.
Ang mga biktima ang ginapahayag nga nagatrabaho sa lain-lain nga Chinese medical equipment companies kag nagbisita sa Pilipinas para sa isa ka business trip.
Ang pamilya sang isa sa ila ang nagbayad sang three million yuan ($413,000) bilang ransom para sa kidnappers.
Ini na ang ikatatlo nga kidnapping case nga naga-involve sang Chinese citizens.
Sang Hunyo, tatlo ka mga Chinese citizens ang ginkidnap sa Manila apang ginhilway man kun sa diin ang mga suspek ang ginalakipan sang indi magnubo sa apat ka police officers.
Sang Oktobre sang nagligad nga tuig, siyam ka mga tawo kalakip ang anom ka Chinese ang ginkidnap sa high-end villa compound sa southern Manila.
Apat ka mga Chinese citizens ang napatay kag missing ang duha tubtob subong.
