Magapabilin nga mahal ang presyo sang kamatis subong nga tig-ululan na sa pungsod suno sa farmers’ group nga Philippine Chamber of Agriculture and Food, Inc. (PCAFI).
Suno kay PCAFI president Danilo Fausto, ginaapektuhan sang ulan ang pagtubo sang kamatis amo man ang iban nga ulutanon rason nga apektado man pati ang presyo.
Nagpanawagan man ini sa Department of Agriculture (DA) nga hatagan na sang solusyon ang kakulangan sang post-harvest facilities agud masiguro nga ma-preserve ang kamatis kun mag-abot ang peak harvest season.
Gin-suhestyon sini ang iban nga mga proseso sa pag-convert sang kamatis kaangay sang tomato paste kag tomato sauce.
Antes sini, matandaan nga baliskad ang pahayag sang DA bangud ginsiling sini nga maganubo ang presyo sang kamatis makaligad ang duha ka semana kag magabalik sa nauna nga presyo nga P80 kada kilo.
Nahibaluan nga sa price monitoring sa pila ka mga merkado, yara na sa P130 tubtub P200 per kilo ang presyo sang sini nga produkto — bagay nga gin-angot sang DA sa epekto sang Bagyo Aghon sa Southern Tagalog region.
Nagpasalig man anay ang ahensya nga lantawon kun may retailers nga nagapatuman sang overpricing.
