Indi gihapon magtambong sa Senate hearing sa Hulyo 10 ang suspendido kag kontrobersyal nga alkalde sang Bamban, Tarlac nga si Alice Guo ukon si Guo Hua Ping bangud sa “trauma” nga iya na-eksperyensyahan.
Sandig ini sa kumpirmasyon sang iya abogado nga si Atty. Stephen David nga nagsiling man nga ginatugyan na lang sini sa Senado kun mag-isyu sila sang arrest warrant kun indi mag-comply ang opisyal sa subpoena bangud sa indi man sini pagtambong sa nagligad nga hearing.
Suno kay David, indi man mapwersa nga magtambong si Guo kun nagamasakit ini kag mahimo pa gani suno sa iya nga maggamit sang Zoom ang mga senador agud nga ma-check ang iya kondisyon.
Pahayag pa sang legal counsel, “traumatic” ang natabo sa alkalde kag masami ini nga nagahibi bangud ginarason sini nga wala man siya sang ginpatay nga tawo, wala sang ginkawat sa gobyerno, kag wala man ini sang ginsakit nga bisan sin-o.
Dugang pa sang abogado, indi na gusto ni Guo nga magtinir sa Tarlac bangud sa drones nga nakit-an sa Bamban halin sang nagsugod ang imbestigasyon sang Senado.
Gusto sang abogado nga ipasaka sa Korte Suprema ang pamangkot kun legal bala ang Senate investigation apang indi magpasugot si Guo, suno gihapon sa legal counsel. Dapat man suno kay David nga ang Ombudsman kag ang mga korte ang mag-uyat sa imbestigasyon sa baylo nga Senado.
Kaangot diri, nagpaandam naman si Senator Win Gatchalian nga i-cite in contempt kag ipa-aresto si Guo kun indi ini magsipot sa hearing sang committee sa Senado sa Hulyo 10.
Matandaan nga ginsaad ni Guo ang “anxiety” bilang rason sa iya pag-absent sa hearing sang Senate committee on women and children sang Hunyo 26 nga ginapamunuan ni Senator Risa Hontiveros.
Sa masunod nga hearing, natalana naman nga ipaatubang si Philippine Amusement and Gaming Corp. Chairman Alejandro Tengco agud nga masapubliko sini kun sin-o ang gin-alegar anay myembro sang Gabinete ang nag-lobby agud nga mahatagan sang lisensya ang iligal nga Philippine Offshore Gaming Operators (POGOs).
