ILOILO CITY- Nagapabilin nga missing ang isa ka Filipino nga manugpangisda matapos nga nabungguan ang iya baroto sang wala pa matumod nga barko sa West Philippine Sea.
Suno kay Philippine Coast Guard (PCG) spokesperson Rear Admiral Armand Balilo, nabungguan ang fishing boat nga Fbca John Robert sang unidentified vessel kapin 62 nautical miles southeast sang Sampaloc Point sa Subic, Zambales rason nga naglugdang ini.
Pahayag ni Balilo, apisar nakaluwas ang isa ka sakay nga si Robert Mondoñedo, 47 anyos, matapos na-rescue, wala naman makit-an tubtob subong ang iya utod nga si Jose Mondoñedo.
Ginmando naman ni PCG Commandant Admiral Ronnie Gil Gavan sa BRP Sindangan nga pangitaon ang nadula nga manugpangisda.
Ginpahayag naman ni Senator Francis Tolentino, chairperson sang Senate panel on maritime and admiralty zones, ang barko nga nagbunggo sa baroto ang ginaalegar nga may Chinese characters nga nakasulat ang “Yang Fu,” apang indi pa matumod kun diin ang registry sini.
Suno naman kay Balilo, ginaid-idan na sang PCG ang automatic identification system para sa cargo vessels kag iban nga commercial vessels sa lugar.
Ang maritime incident ginatawag nga allision — baliskad sa collision — kun ang isa ka vessel ang nagbunggo sa isa ka stationary boat.
Ang pinakaulihi nga allision incident naga-involve sang Marshall Islands-flagged carrier nga nagluntad sa Scarborough Shoal sang October 2023, nga nagresulta sa kamatayon sang tatlo ka crew members.
