ILOILO CITY – Ginatugyan na ni Iloilo City Mayor Jerry Treñas kay Iloilo City Lone District Rep. Julienne ‘Jamjam’ Baronda ang pagpagwa sang pangalan sang mga ginadudahan “sleeper agents” ukon spy nga naga-istar sa syudad.
Sa interview sang Bombo Radyo kay Treñas, iya ginpahayag nga si Baronda ang may personal nga ihibalo sa hulag sang mga ginapahayag “sleeper agents nga naga-istar sa mga exclusive subdivision sa syudad kag indi makahibalo maghambal sang lengwahe nga English.
Matandaan nga personal nga ginhingyo ni Rep. Baronda kay Justice Secretary Jesus Crispin Remulla nga imbestigaran ang pagdamo sang mga undocumented nga Chinese na naga-istar sa Puerto Real de Iloilo sa La Paz, Monterosa Subdivision sa Mandurriao, at Ledesco Subdivision sa La Paz.
“Though these foreigners have not caused trouble in the community and have been nice to their neighbors, what bothers the Ilonggo residents is that there are households where no one or only one of five speaks English.”
Suno sa mamalidha, makaduluda nga makabakal ang mga Chinese sang dalagko ng mga balay nga nagabalor sang P30 tubtob P50 million kag mangin sang mga luxury sports utility vehicles.
Apisar suno sa iya nga duda lang ang mga ini, nagakadapat sa gihapon nga i-validate ini sang Department of Justice sa bulig man sang National Bureau of Investigation kag Bureau of Immigration kun may kaangtanan ang mga ini sa iligal nga aktibidad nga mahimo makaapekto sa national security.
“We want to ensure that our people are safe and that our national security is protected.”
Ginbalikan man sini ang pagkadakop sa 17 ka mga undocumented nga Chinese nationals sa Lawaan Village sa Barangay Balantang, Jaro, Iloilo City nga nagapatigayon sang cybersex kag human trafficking activities.
