JARO, ILOILO CITY – Nagbakod pa gid ang pagduda sang mga otoridad nga inside job ang natabo nga ginhimo sa pagpangawat kag pagpatay sa isa ka foreman sa sulod sang barracks sa Barangay Benedicto, Jaro, Iloilo City.
Ang biktima amo si Froilan Bernas, 63, residente sang Barangay Sooc, Arevalo, Iloilo City.
Sa interview sang Bombo Radyo kay Police Captain Jeffrey Delgado, hepe sang Iloilo City Police Station 9, iya ginpahayag, nga possible madugangan pa ang person of interest sa natabo nga krimen ini bangud may mga trabahador pa nga gina-suspetsahan nga nagpatay sa foreman nga wala na nagbalik sa trabaho matapos natabo ang insidente.
Suno sa natungdan, isa sa ginatumod nila nga person of interest, amo ang nagpangayo sang ininit kay Bernas kag nakasapo sa biktima sa sulod sang barracks.
Ang amo nga trabahador nga nakasapo kay Bernas, amo man ang ginadudahan nga nakit-an sa Close Circuit Television (CCTV) nga nagbukas sang pertahan kag nagsulod sa barracks pasado las 3:59 tubtob las 4:09 sa kaagahon sang Hulyo 8 sa mismo adlaw nga natabo ang krimen.
Nahamtang ang apat ka mga CCTV malapit sa lugar nga ginabanta 20-25 metros ang kaluyuon sa barracks sa diin ginalantaw nga dako ang mabulig sini sa padayon nga imbestigayon.
Naguwa sa inisyal nga report nga 11 gid ka buno ang naangkon sang foreman nga amo ang gintunaan sang iya kamatayon.
Sa subong, indi pa matumod kon sin-o gid ang may kahimuan sa krimen, bangud nagadugangpa ang person of interest sa natabo nga insidente.
