Ginkumpirma ni Vice President Sara Duterte nga indi ini magtambong sa ikatatlo nga State of the Nation Address (SONA) ni President Ferdinand “Bongbong” Marcos, Jr.
Ginpahayag ini sang bise-presidente kadungan sang inagurasyon sang Child and Adolescent Neurodevelopment Center sa ospital sa Davao City.
“I am appointing myself as the designated survivor,” suno pa sa bise-presidente.
Kun sa Estados Unidos, ang termino nga “designated survivor” amo masami ang appointed member sang Gabinete sang presidente ukon ang tawo sa presidential line of succession nga ginhingyo nga mag-absent sa SONA agud nga mag-take over sa presidency pananglitan may yara sang catastrophic incident nga maga-resulta sa incapacitation sang mga persona nga yara sa linya sang succession.
Sa Pilipinas, may yara man sang kaangay nga hagna nga gin-file ni anay Senador Panfilo Lacson sang 2019.
Ini ang labing-una nga tion nga indi magsipot si Sara sa SONA ni Marcos apisar nga runningmate sila sang 2022 elections sa idalom sang “UniTeam” coalition.
Sang nagligad nga bulan, nag-resign si Sara sa Gabinete ni Marcos. Ang iya pagpanaog bilang tiglikom sang Department of Education ang mangin epektibo sa Hulyo 19. Magluwas diri, nanaog man siya bilang vice chairperson sang National Task Force to End Local Communist Armed Conflict (NTF-ELCAC).
Kun matandaan, sa opening ceremony sang Palarong Pambansa 2024, naka-schedule kuntani nga magtambong ang presidente kag ang bise-presidente, apang wala man nagpakita si Sara apisar nga yara man ini sa Cebu sang amo nga tion.
Matandaan nga lakip man sa gin-imbitar para sa SONA ni Marcos amo ang former presidents. Wala pa sang kumpirmasyon kun magatambong ukon indi ang amay ni Sara nga si former President Rodrigo Duterte.
