Duha-duha pa kun makatambong si Senador Ronald ‘Bato’ Dela Rosa sa ikatatlo nga State of the Nation Address (SONA) ni Presidente Ferdinand ‘Bongbong’ Marcos, Jr. sa Hulyo 22.
Suno sa senador, nagasakit ang iya tuhod kag basi kun indi ini makalakat sang maayo sa sulod sang venue.
“Titingnan ko. Masakit ‘yung tuhod ko eh. Titingnan ko kung maka-attend ako,” pahayag sang senador. “Medyo seryoso kasi masakit ‘yung tuhod ko. Baka hindi ako makalakad-lakad doon sa loob. Titingnan ko lang din ha, titingnan ko. Kung hindi, baka hindi ako maka-attend.”
Antes kay Bato, matandaan nga nangin-agaw atensyon man ang statement ni Vice President Sara Duterte sang ginkumpirma sini nga indi ini magtambong sa SONA. Wala sang ginhatag nga rason ang bise-presidente apang ginsiling sini nga gina-appoint niya ang iya kaugalingon nga “designated survivor” apisar nga wala man sang amo sini nga designation sa Philippine government.
Ang latest statement ni Sara amo pa ang nagdabok sa espekulasyon nga indi na maayo ang ila relasyon ni Marcos apisar nga updanay ang mga ini sa UniTeam sang 2022 elections.
Nahibaluan nga full-swing na subong ang preparasyon sa SONA sa Batasang Pambansa kun sa diin P20-million ang ginpain sang gobyerno para sa programa.
