Naaresto na sang National Bureau of Investigation-National Capital Region (NBI-NCR) ang suspek nga ginatudlo nga nag-abduct sa isa ka accountant nga iya nakilala paagi sa dating application.
Suno kay NBI-NCR Chief Attorney Rommel Vallejo, yara sa possession sang suspek ang identification cards, ATM cards, credit cards, cell phone, kag puti nga sports utility vehicle (SUV) sang 35-anyos nga biktima nga si Irene Melican nga masobra isa ka bulan na nga missing.
Pahayag ni Vallejo, sang wala nakapauli ang biktima, gintawagan ang mga abyan sini ang iya Facebook account kag isa ka bata ang nakasabat. Gin-istorya nila ang bata, apang sang ulihi, may nag-agaw sang cellphone.
Sang Hunyo 13 naman, nakita sa CCTV ang suspek kag duha sini ka mga kaupod nga babaye nga nagabakal sang malahalon nga cellphones sa San Juan kun sa diin ginagamit nila ang credit card kag ID sang biktima. Hungod nga ginlain ang laragway sa ID.
Suno sa NBI, ginkuha sang suspek ang P3.5 million halin sa joint account sang biktima kag sang iya iloy.
Sang ginbalikan ang mga hitabo, natukiban nga nagkilalahay ang suspek kag biktima paagi sa isa ka dating app sang Septyembre 2023. Sang amo nga tion, ginpakilala sang lalaki ang iya kaugalingon bilang “single” apisar pa nga may tatlo na siya ka bata kag nagabusong pa ang iya asawa.
Sang Hunyo 3, gintawagan sang suspek ang biktima kag nangayo sang bulig bangud naaksidente siya. Sang amo nga adlaw ulihi man nakit-an ang biktima.
Samtang, ginsaysay naman sang NBI nga sang nadakpan na ang suspek kag ginpaidalom na sa inquest, gintilawan pa sini nga bun-on sang tinidor ang abogado sang Public Attorney’s Office (PAO).
“After the interview, tumalikod ang PAO lawyer. Kumuha ng tinidor at susugurin ang PAO lawyer. But na-subdue siya ng kasamahan natin, nagtakubuhan ang mga PAO lawyers. Nakita natin kung gaano ka-violent ang taong ito,” suno kay Vallejo.
Ginkasuhan ang suspek sang kidnapping, serious illegal detention, carnapping, kag violation sang Access Devices Act.
Tubtub subong, missing ang biktima. Nagapanawagan ang NBI-NCR sa publiko nga ipahibalo gilayon sa otoridad kun may nakahibalo kun sa diin na ang lokasyon sini.
