ILOILO CITY- Nagapati ang Department of Agriculture nga makabulig ang Jalaur River Multi-Purpose Project II sa tion sang La Niña.
Una na nga ginpahayag sang Philippine Atmospheric, Geophysical, and Astronomical Services Administration (PAGASA) nga may yara na sang 70% chance sang La Niña nga matabo sa Agosto tubtob Oktubre.
Sa interview sang Bombo Radyo kay Department of Agriculture Sec. Francisco Laurel Jr., iya ginpahayag nga may yara sang ibutang ang National Irrigation Administration sang solar irrigation system sa proyekto kag mahatag man ang Department of Agriculture sang water pump sa mga mangunguma.
Suno sa iya, mahimo man ang Bureau of Soil and Water Management sang small impounding projects agud makuha ang sobra nga tubig kag magamit pa sa palaabuton.
Samtang plano naman sang National Irrigation Administration nga bag-uhon ang cropping calendar.
Suno kay National Irrigation Adminisration Administrator Engr. Eduardo Guillen, mas maayo nga mangin science-based na ang pagtanom agud mahibaluan kun san-o pwede makatanom ang mga mangunguma.
Mas maayo kun sa dry season makaduha ka cropping ang mga mangunguma kag mangin bonus na lang ang wet season.
