Nagpaandam ang Department of Agriculture (DA) nga mahimo manabat sa idalom sang Price Act ang traders nga nagapamentaha kag nagahimo na sang overpricing kaangay sang P250 per kilo nga presyo sa manok.
Suno sa ahensya, ang presyo sang sini nga produkto ang dapat magpabilin lamang sa P200-P210 kada kilo.
Una diri, si Agriculture Assistant Secretary and spokesman Arnel de Mesa ang nag-report nga may mga mercado particular na sa Muñoz sa Quezon City nga nagabaligya sang P250 kada kilo nga manok nga P40 nga mas mataas ipaanggid sa prevailing price.
Naga-pakig-angot na subong ang DA sa local government agud matumod ang mga manugbaligya nga naga-overprice sa manok.
Wala naman sang plano ang ahensya nga mag-implementar sang suggested retail price apisar sang nakit-an nga pagtimbuok sa presyo.
Ginrason man sang opisyal nga ang temporary ban sa imported poultry products halin sa Minnesota sa US sa tunga sang outbreak sang bird flu ang nakaapekto id sa farmgate price bangud ang Estados Unidos amo ang main source sang parent stocks nga amo ang naga-produce sang mga piso ukon day-old chicks.
Ginpahayag man ni Agriculture Secretary Francisco Tiu Laurel, Jr. nga ang madasig nga paglapta sang bir flu sa US ang nagtulod man sa mas masangkad nga coverage sang trade restrictions agud malikawan nga makasulod sa Pilipinas ang highly pathogenic avian influenza H5N1 virus kag maprotektahan man ang local poultry population.
Magluwas diri, base sa report sang United Broiler Raisers Association, ang natabo nga El Niño phenomenon ang nakaapekto man sa chicken production sa pungsod.
