ILOILO – Gindayaw sang Chairman sang House Committee on National Defense and Security ang kaundan sang State of the Nation Address (SONA) ni President Ferdinand “Bongbong” Marcos Jr.
Sa interview sang Bombo Radyo kay Iloilo 5th District Rep. Raul Tupas, iya ginpahayag nga lakip sa mga report ni Marcos nga ginpalakpakan sang tanan amo ang panindugan sini sa West Philippine Sea kag pag-ban sa kontrobersyal nga Philippine Offshore Gaming Operators (POGOs).
Suno kay Tupas, sa isyu sa West Philippine Sea, ginhatagan sang standing ovation sang mga tumalambong ang ginpahayag sang presidente nga magapabilin nga iya sang Pilipinas ang amo nga teritoryo anuman man ang matabo.
Ini ang ginpahayag sang presidente sa tunga man sang nagakatabo nga tensyon sa West Philippine Sea kag sa ginahimo nga pagpangharass sang China.
Samtang sa isyu naman sa POGO, ginpahayag ni Tupas nga madamo sang mga nagdayaw sa pagpa-untat sang presidente sa tanan nga operasyon sang POGO.
Nahibaluan nga naangot ang operasyon sang POGO sa eskandalo kaangay sang money laundering, immigration bribery, illegal recruitment, kag human trafficking.
Samtang, ginkalipay man ni Tupas nga ginpabugal gid sang presidente ang mega dam sa Visayas nga Jalaur River Multi-Purpose Project sa Calinog, Iloilo.
Suno kay Tupas, dako gid nga bulig sa mga mangunguma ang nasambit nga proyekto.
Nahibaluan nga ginpangunahan mismo sang presidente ang inagurasyon sang Hulyo 16.
Gindugangan naman sang Marcos Jr., administration ang pondo sang P8 billion agud makumpleto ang proyekto.
Ang P19.70 billion project ang may yara sang tatlo ka major components nga ginalakipan sang, irrigation development; environmental kag watershed management; kag institutional development.
