Ginpaidalom na sa state of calamity ang National Capital Region (NCR) bangud sa Bagyo Carina.
Suno kay Department of the Interior and Local Government Secretary Benhur Abalos, ang nasambit nga deklarasyon ang kasunod man sang wala untat nga pag-ulan nga nagresulta sa pagbaha sa Metro Manila tuga sang Bagyo Carina.
Sa subong, lubog sa gihapon sa tubig baha ang nagkalain-lain nga mga lugar sa NCR.
Una diri, ginpahayag ni President Ferdinand R. Marcos Jr., nga ginatugyan na niya sa mga local chief executives pinaagi sa Metro Manila Council (MMC) ang pagdeklarar sang state of calamity sa NCR.
Ang pahayag ni Marcos ang kasunod man sang rekomendasyon ni Abalos nga ipaidalom sa state of calamity ang Metro Manila.
Nakigsapol man ang presidente kag si Abalos sa MMC sa diin gindiskusyunan ang mga tikang sang gobyerno sa epekto sang bagyo.
“It’s up to local communities to decide because they know best, they know best what they need.”
Bangud sa deklarasyon sang state of calamity, ginapasugtan ang mga local goverment units nga magamit ang calamity funds kag makontrol ang presyo sang basic commodities agud malikawan ang pagpamentaha.
