Mangin ang mabaskog nga pag-ulan ang wala nakapugong sa maragtason kag maduagon nga opening ceremony sang Paris Olympics 2024 nga gintambungan sang delegasyon sang nagkalain-lain nga mga pungsod lakip ang Pilipinas.
Nagsugod ang seremonya eksakto 1:30 kaina sang kaagahon oras sa Pilipinas kag nagtapos pasado na ‘las singko subong nga kaagahon.
Indi kaangay sa iban nga edisyon sang Olympiada kun sa diin ginapatigayon ang seremonya sa stadium, ini nga kahiwatan ang ginhimo sa River Seine kun sa diin nagparada ang mga atleta samtang yara sa mga sakayan kag naglabay sa historic landmarks sa City of Love kaangay sang Notre-Dame de Paris cathedral kag Louvre.
Nagtapos ang parada sang mga sakayan tubtub sa Trocadero Gardens nga nahamtang malapit sa bantog nga Eiffel Tower.
Suno kay Bombo Hexyl Panes, international correspondent sa Paris, France, ang may pinakamatunog nga hugyaw kag palakpak amo ang Estados Unidos sang Amerika nga may 592 ka mga atleta sa pagpanguna sang flagbearers sang pungsod nga sanday tennis superstar Coco Gauff kag basketball icon LeBron James.
Ulihi naman nga nag-abot sa Trocadero Gardens amo ang host nation nga may 571 ka mga atleta.
Samtang, nagpasakop man sa parade of nations ang mga atleta sang Pilipinas nga nagasuksok sang Sinag Barong nga himo sang renowned Filipino designer nga si Francis Libiran. Kaupod sang Pilipinas sa sakayan amo ang mga atleta sang Puerto Rico kag Poland.
Nagpanguna sa 22 ka atleta sang pungsod ang Olympic silver medalists nga sanday Nesthy Petecio kag Carlo Paalam.
Ginbanta sang organizers nga naglab-ot sa 320,000 ang tumalan-aw lakip ang A-list celebrities nga naglinya man sa River Seina.
Sa labing-una man sa maragtas sang Olympiada, maga-compete sa Paris Olympic Games ang equal 50-50 ratio sa male kag female athletes suno sa International Olympic Committee.
SEGURIDAD
Samtang, mas nangin hugot naman ang seguridad malapit sa venue kasunod sang pagpang-sabotahe kag arson attack sa porsyon sang high-speed rail network sang France inoras antes ang opening ceremony.
Ini nga mga pagpang-atake nga gintawag sang otoridad nga “coordinated acts of sabotage” ang nag-atrasar sang byahe sang ginatos ka mga pasahero. Sang ulihi, ginkumpirma nga 800,000 gid ka mga pasahero ang naapektuhan sa rail traffic.
Bangud sa sabotahe, ginpahayag sang national train operator nga apektado gid ang ila nga Atlantic, northern kag eastern lines.
Ginpahayag man nga daku ang halit sa ila pasilidad bangud ginsunog ini kag posible nga indi tayuyon ang operasyon tubtub sa weekend bangud kinahanglan pa ang repair.
