Gin-endorso na ni anay US President Barack Obama si Vice President Kamara Harris bilang kandidato sang Democratic Party para sa presidential elections subong nga tuig kag magabunggo kay anay Presidente Donald Trump nga amo naman ang official candidate sang Republicans.
Si Obama ang pinakaulihi sa active high-profile figures nga naghatag sang suporta kay Harris kasunod sang pag-atras sang 81-anyos nga si President Joe Biden sa presidential race.
Una nga nagguwa ang impormasyon nga pabor si Obama nga magpatigayon sang nominating contest kadungan sang Democratic national convention sa Chicago agud nga opisyal nga mahingadlan kun sin-o ang mangin standard bearer sang Democrats.
Apang nakuha na ni Harris ang suporta kag endorsement nanday Biden, Bill kag Hillary Clinton, Nancy Pelosi, host sang state governors kag kadam-an sang senior Democrats sa Kongreso rason nga nagdugang si Obama sa lista para matib-ong pa ang kandidatura sang bise-presidente.
Sang ginkumpirma sang 44th president ang iya suporta kay Harris paagi sa phone call, kaupod sini si anay First Lady Michelle Obama.
Si Obama amo ang una nga Black US President kag pananglitan mangin kandidato si Harris sang Democrats kag magdaog batok kay Trump, siya naman ang mangin first woman, first Black woman kag first person nga may south Asian descent nga magaserbe nga presidente sang Estados Unidos sang Amerika.
Nahibaluan nga ginlunsar na sang Harris campaign ang “weekend of action” nga amo ang nagamarka sang 100 nga adlaw antes ang eleksyon.
