Magabalik sa ibabaw sang ring subong nga adlaw ang Pinoy boxing legend nga si anay Senador Manny Pacquiao!
Balantayan ang exhibition match sang amo nga boxing icon batok sa Japanese kickboxer nga si Rukiya Anpo sa main event sang Super RIZIN 3 sa Saitama Super Arena sa Japan.
Ini nga match nga may 152-pound catchweight ang magalawig sang tatlo gid lamang ka rounds.
Base sa nagaguluwa nga impormasyon, gina-seryoso ni Pacquaio ini nga exhibition fight bangud sa ginapanan-aw nga pagbalik sini sa competitive boxing.
Paborito man ang 45-anyos nga anay senador nga magdaog, bangud magluwas sa iya 62-8-2 win-loss-draw card, indi kuntani si Anpo ang maka-atubang sini bangud last-minute replacement lang ini nga Japanese fighter sa mixed martial artist nga si Chihiro Suzuki nga nag-withdraw bangud sa injury sa iya nga butkon.
Ang 28-anyos naman nga si Anpo nga isa ka seasoned kickboxer amo man anay ang K-1 super-lightweight champion kag may 5 inches nga mas mataas ipaanggid sa 5-foot-6 nga si Pacquiao.
Ginapahayag man nga ini nga Anpo fight ang paagi sang nagaisahanon nga eight-division boxing champ nga matilawan kun handa na siya sa pagbalik sa pro ranks.
Katapusan nga nakahampang si Pacquiao sang Agusto 2021 kun sa diin ginlutos ini sang Cuban fighter nga si Yordenis Ugas via unanimous decision.
Base sa nagaguluwa nga impormasyon, interesado ang Pinoy champ nga atubangon si reigning World Boxing Council welterweight champion Mario Barrios subong nga tuig.
